tirsdag 4. april 2017

Historier frå min barndom under krigen


Her er 100 sannferdige historier frå 1940-talet. I minst 60 år har eg skrive om opplevingar i barndomen, og no har eg redigert dei og lagt inn bilete.  Sjølvsagt et alt frå min ståstad, og slik må det vere når ein skriv eigne minner. Eg hadde ei svært opplevingsrik tid med tyske soldatar, bombeangrep mot båtar og tyske batteri, og naturalhushald av fisk, sauekjøt og poteter. Far arbeidde som lærar og spion for dei allierte, og i ettertid har han og mor fortalt mykje om det fårlege arbeidet. Mi verd den gongen var Søre Sunnmøre, og sommarturar gjekk til besteforeldra i Vedelda og på Kragset.  Alt kan lesast på PC frå denne CD-plata og skrivast ut på papir.  Detter er verkeleg konsentrert lokalhistorie frå ei eineståande periode i historia.

onsdag 22. mars 2017

2017 Gran Canaria

Første 14 dagane av februar 2017 var vi i St. Agustin på Gran Canaria. Janne, dotter til Gunn og Arne Steinhovden, hadde tinga husvære til dei i same hotell og tidsrom som vi. Dertil var Janne, Rune og borna i Puerto Mogan samstundes. Til alt overmål var Kirsten og Ottar i Patalavaca.  Gran Canaria vart altså ein møteplass i Steinhovdenslekta! Vi var dagstur til Las Palmas, busstur til grotter oppe i fjella og til 70-årsfeiring for Kirsten i Patalavaca. Vi gjekk turar på strandpromenaden, sola oss ved badebassenget, var i Sjømannskirka i Arginigin og gjekk mykje i butikkar og restaurantar.  Dette vart ein vinterferie i sola med alle dei ingrediensar som gjer slikt vellukka !

mandag 9. januar 2017

Slektbesøk i USA

Slekta i Minesota og Wisconsin kjem frå Teigen i Barlindbotn nær Steinhovden. Tanta til Anders, Bjørg sin far, var inngifta i Hopeteig-slekta, og  fleire av dei har besøkt oss i Norge. Vi  har  hatt stor glede av å besøke dei 7 gonger i Midt-Vesten. Og det kan sjå ut som dei har glede av å vise fram slekt frå gamlelandet Norge. I alle høve samlar dei slekt og vener for samvær med oss! Kvar gong har vi leigd eller lånt bil, og køyrt vide ikring. Å køyre i USA er greit. Dette er bilens heimland. Vi hadde med mor mi, Karen, då ho var 85 år, og mor til Bjørg, Anna, då ho var 89 år. Begge greidde seg godt, sjølv om engelsken var mindre god. På denne CD-en ser ein dei fleste slektningane, og i tillegg får ein oppleve Niagarafossen, presidentane i fjellet i Mount Rushmore, og Prærien med museum om dei første nybyggjarane. Dertil Vichie på besøk til røtene i Steinhovden i 2013.


torsdag 3. november 2016

Tur til El Campello i Spania 2016

No siste veka i oktober 2016 har Bjørg og eg vore i El Campello på den Spanske solkysten. Tur - retur Torp - Alicante med fly + 1 veke hotell med frukost, kosta 5581 kr for begge tilsaman. Tida gjekk med til å sole seg på stranda, gå turar, handle suvenirar og julegåver, og ete 1 til 2 gonger dagleg i små restaurantar.  Maten og sola tålte vi godt, og mi gangsperre gav seg etter kvart. Dette var godt utanfor høgsesongen, men temperaturen i lufta held seg på ca. 25 grader. Storparten av turistane var på vår alder. Dette var definitivt ikkje av våre mest opplevingsrike reiser, men som pensjonert nordmann, er det interesseant å kunne noko om denne type turisme også.

lørdag 15. oktober 2016

Slektstreffet i Steinhovden i juli 2016

Siste veka i juli 2016 møttest mange av etterkomarane til Anna og Anders Steinhovden. Vi gjekk bygdevandring frå gard til gard med flinke guidar, og vi hadde ei større samkome i leirstaden Teigen. Slike slektstreff gjer at den oppvaksande slekt får kjennskap til røtene sine. På denne CD-plata kan ein lese om Anna og Anders, og om barna deira, barnebarn,søsken, foreldre, og besteforeldre. Der er eigne avsnitt om Steinhovden og Redalen der Anna kom frå. Eg har  fått plass til Anna sitt album som ho sjølv har skrive om livet sitt. Dertil er der mange soger frå bygdene og om turmål i Sunnfjord. Eg har  lagt inn masse fotografi frå Redalen og Steinhovden fram til ca. 2010. Sjølvsagt er der også fotografi frå slektstreffet no i år. Dette er ei slektskrønike i særklasse.

torsdag 7. juli 2016

Finnmarkturen i juni 2016

På grunn av krig og uro reiser svært få turistar til Egypt, Tunis og Tyrkia. På Malorca demonstrer dei mot for mange. Vi har funne eit alternativ! I Finnmark er utruleg god plass, sola skin døgnet rundt utan at nokon vert solbrent, reinen beiter mellom husa, og slektningane våre der gav uttrykk for at gjestar var kjekt. Turen opp frå Gardermoen tok 2 timar, kosta ca. kr. 750 pr. person kvar veg,  og der var få trafikantar på vegane. Folk vi møtte, var der for å fotografere fuglar. Verkeleg ein annarleis ferie, og så fekk eg besøkt Vardø og Vadsø der eg ikkje har vore før.

mandag 30. mai 2016

Anders Redal f. 1811. d. 1896. Haugianar. ordførar og Bjørg sin tippoldefar.

Hans Nilsen Hauge reiste som emissær og forretningsmann over heile Norge på begynnelsen av 1800-talet. Læra og ideane hans vart svært populære i Sunnfjord.  Bjørg sin tipp-oldefar, Anders Redal frå Redal i Førdesfjorden, tok arven opp etter Hauge. Anders reiste i årevis i store deler av årtet midt på 1800-talet omkring i Sør-Norge som omreisande talar.  I dette minneskriftet fortel han mykje om dei religiøse oppgåvene sine, men også om korleis han reiste, fekk seg mat og overnatting, og om korleis folk tenkte den gongen. Dette er 76 maskinskrivne sider avskrivne etter hans eigne  dagboksnotat.  Verkeleg ei kvardagsleg og sjølvopplevd historie frå landet vårt for snart 170 år sidan. Dokumentet ligg i Word, og kan lesast på PC og skrivast ut om ein ynskjer.